Mu gihe mu minsi yashize leta ya Kagame yatangaje ko ibiciro by'ibikomoka kuri peteroli bimanuwe kuva kuri 1 030 Frw kugera kuri 970 Frw kuri litiro imwe ya lisansi na mazutu ubu noneho birushije mbere kuko minisiteri y'ubucuruzi yatangaje ko litiro ya lisansi na mazutu zigiye ku giciro cya 1 050 Frw mu mujyi wa Kigali. Ababisesengura bakaba bahamya ko iri zamuka ry'ibiciro by'ibikomoka kuri peteroli biturutse ku ihagarikwa ry'imfashanyo zagenerwaga leta ya Kagame rikaba ryaraturutse ku birego Loni yareze Kagame n'agatsiko ke mu gufasha umutwe w'inyeshyamba za M23 zirwanira muri Kongo.
Kuba ariko mu minsi ishize harabayeho kugabanura ibiciro by'ibikomoka kuri peteroli abenshi babibonyemo amayeri ya leta yakoresheje kugirango yereke abantu ko nta kibazo ko ahubwo bihagazeho bakagabanya ibiciro bya peteroli, ababibonera hafi bemeza ko ayo mayeri yari ayo kwerekana ko igihe ibiciro bizaba byazamutse bitazaba bitewe no guhagarikwa kw'imfashanyo. Ubu noneho ikibazo gihise kigaragaza ku buryo bwihuse ndetse ababibona neza bakaba bemeza ko umwaka ushobora kurangira litiro ya lisansi na mazutu ikabakaba 1 500 Frw, ibi kandi ngo bikaba bizanajyana n'izamuka rikabije ry'ibiciro ku masoko kuko n'agaciro k'ifaranga ry'u Rwanda kagenda gatakara uko bwije n'uko bukeye. Ibi bikazagira ingaruka zikomeye ku buzima bw'abanyarwanda dore ko n'AgDF kagiye kuzatera abana kurwara bwaki.
Iri takaza ry'agaciro k'ifaranga ry'u Rwanda kandi naryo rifite ingaruka ku buzima rusange bw'igihugu kuko kugeza magingo aya amakuru aturuka mu mabanki atandukanye aremeza ko Banki Nkuru y'u Rwanda yatanze amabwiriza mu ma banki ko bagomba guhagarika ibikorwa byo gutanga inguzanyo ndetse n'umusogongero ku banyamishahara (avance sur salaire) kuko Banki Nkuru itinya ko udufaranga duke dusigaye mu kigega twakwirenga na ya mishahara ikabura maze bigateza ihungabana rikabije (crise) mu bakozi ba leta. Iki kibazo ariko n'ubundi kikaba gishobora kwigaragaza vuba kuko abakozi ba minisiteri y'imari bemeza ko nta faranga rikirangwa muri iyo minisiteri dore ko hari n'umukozi wabizize akirukanwa azira kubwira abari baje kwishyuza muri iyo minisiteri ko nta mafaranga akiyirangwamo.
Byari bikwiye ko Kagame yemera kuva ku izima akareka guteza imivurungano muri Kongo kuko n'ubwo we yizeye ko atazagira ikibazo cy'inzara kuko yasahuye byinshi akanigwizaho umutungo w'igihugu ariko abaturage nibamara kubura epfo na ruguru bazahaguruka bamusabe kuva ku butegetsi nk'uko aherutse kubyisabira.
Ubwanditsi
No comments:
Post a Comment